由我做𡃁模年代至今，望返轉頭大大話話離開咗娛樂圈都已經有四五年光境 。
其實我都冇話離開，又冇退出⋯只不過走咗去結婚生仔，做左媽媽之後真係冇咁多時間可以去追夢！同埋我個夢 ⋯成日都要著好少布，生左幾件，坐月坐得咁辛苦真係好怕冷親～
所謂嘅夢，始終有一日會完 ，家庭生活又係人生嘅新開始 。
以前娛樂圈嘅日子，就好似我有一個角色，好似拍電影咁，今日做女朋友、聽日做老婆，又或者扮演一個醜女！唔使拍戲嘅時候，我仍然都係擔當一個角色，就係大家鍾意睇嘅我！講嘢大方得體，性感就少不免，談吐斯文大方，最好人人封你為女神！都係一般𡃁模嘅基本條件 ～
2020 年嘅今日，我係一個媽咪、一個老婆、一個師奶，我唔需要再扮女神，我可以做返我自己！
所以我決定咗開呢個頻道，你睇到嘅就係一個最真實嘅我。
如果你接受到冇嘢學、冇得着、冇性感、講嘢比較直少少、快少少、急少少同埋粗鄙少少🤏不妨入嚟睇吓-
《彤你吹水》
Search